Revelation of John 4

A Gula Hariki na Vure

1 ^aMuri a mata lakea, a masia a logo i mata ka na hunu. Muri, a longo tabu a lohona viri a longo mugea, ra viri i nangi dagi manga a nangina tavure. I taki iau, i ta maea, “O sike valai. Ga vakasiri ioe vona a maki ge bele muri ma.” 2 ^bMalaviriri kunana, a Hanu Kiripiripi i bele tora nau, a matai a gula hariki i tabuli na hunu, a bakovi tara i made vona. 3 ^cA bakovi iea i para hidi manga a kedo a iaspa, a kedo a kanelian. A kuriki i pesi halui a gula hariki, i para manga a kedo goma goma ni gale a emeral. 4 ^dA gula hariki i ravulu rua a polona i va ri pesi halui a gula hariki iea. E huriki a nupesi ala ravulu rua a polona i va ri made na gula hariki nga. Ri rodo a varakia keakea, ri kube a tama hariki ni rata na gol. 5 ^eA matai a vila i maravila tala na gula hariki, a longoa a nangina hini i kururu. A nipara i polorua ri huvi na ngalana gula hariki. Ra nipara nga, a hanuna Vure i polorua. 6 ^fA maki manga a dari i malilo kamumu, i mata manga a glas, i maga hateka, i tabuli na ngalana gula hariki iea.

A maki mahuri i va to pesi halui a gula hariki, na tabekena i va. A matane tou i kupo hateka, to kavitagu a ngalane tou, a bitone tou. 7A viri tara i mata manga a laion. A viri tara i mata manga a tuna bulmakau. A viri tara, a matana i mata manga a matana bakovi. A viri tara i mata manga a loha i bebe. 8 ^gRa maka maki mahuri nga, tou lobo to tahoka a karapane tou i polotara. Tou lobo to tahoka a matane tou i kupo na tabeke lobo. Pololilo na karapane tou ranga, i vona a matane tou i kupo. I uka ma ri malo ni kavurikea a Vure. Na haro, na rodo ri ta maea,

“E Bakovi Dagi i Tuhaka Hateka!

I malamala! I malamala! I malamala hateka!

I made hosi, i made ngane, bara i made vakaroro!”

9Na tahuna a maki mahuri nga to vakabagetua, to togoa, to kavurikea ra viri i made na gula hariki, ra viri i mahuri vakaroro, 10 ^hlakea e huriki a nupesi ala ravulu rua a polona i va ri tabuli puru na ngalana, ri kavurikea ra viri i made vakaroro. Ri voro puru na vahana a tama hariki ne ria, ri ta maea,

11“O Bakovi Dagi ne mia, a Vure ne mia. Ioe kunana i kara ioe
e huriki ri gi vakabagetu ioe, ri gi togo ioe, ri gi kavurike a nitora vomu,
a vuhuna ioe o ratarike a maki lobo na ningaru vomu kunana o ratarike ria, ri bele.”